ATA SEMPRE SOR LOLI!!

Chegou o final deste curso e non queríamos irnos sen dar as Grazas a todos os alumnos e as súas familias por axudar de maneira desinteresada ao longo do curso escolar cos diferentes proxectos levados a cabo dende o departamento de Pastoral. Non queremos marchar sen expresar o noso agradecemento e admiración a Sor Loli polos seus anos de dedicación e compromiso neste centro. O seu labor deixou unha pegada indeleble en cada un de nós, e o seu compromiso coa educación e os proxectos de COVIDE-AMVE  foron luz para a nosa comunidade. Aínda que nos entristece a súa partida, desexámoslle o mellor nesta nova etapa, confiando en que a súa luz seguirá iluminando o camiño de quen teña a sorte de cruzarse nel. Grazas por todo o que nos deches e por facernos sentir afortunad@s de traballar ao teu lado.

GRAZAS, Sor Loli!

ORATORIO

Terminou maio e con el, as sesións do oratorio en 6º de Infantil e o primeiro ciclo da Primaria. Este curso, Sor Loli ensinounos a valorar o silencio e o recollemento así como a nosa capacidade de escoita e atención. Ao longo do ano, e a través dos diferentes momentos litúrxicos, desenvolvemos un maior coñecemento da Biblia (coa lectura da Palabra de Deus) e empezamos a cultivar actitudes de agradecemento e oración, esenciais para o noso crecemento persoal e espiritual, os cales nos acompañarán ao longo da nosa vida.

Gracias sor Loli por ensinarnos a escoitar a Xesús, falar con El e aprender a descubrir que quere de nós.

OFRENDA FLORAL

Remata o mes de maio, mes da nosa nai a Virxe María e os nenos e nenas de Educación Infantil viviron un momento moi especial: a nosa tradicional ofrenda floral á Virxe na horta do colexio.

Coas súas pequenas mans e grandes corazóns, levaron flores con moita ilusión e agarimo, acompañadas de sinxelas cancións e oracións cheas de amor.

Un bonito xesto para achegarnos a nosa Nai do ceo e dicirlle, entre pétalos e sorrisos: querémosche moito!

STA LUISA DE MARILLAC

O venres celebramos un día especial no colexio, un día no que con gratitude e alegría conmemoramos a Santa Luisa de Marillac.

Nas diferentes celebracións puxemos a nosa mirada no seu exemplo de fe profunda, humildade activa e, sobre todo, paciencia, unha virtude que cultivou no silencio da oración, na entrega diaria e nos momentos de proba. A súa paciencia non foi pasiva, senón unha espera activa, chea de esperanza, servizo e caridade cara aos máis pobres. Pedímoslle ao Señor que renove a nosa esperanza e a nosa paciencia para seguir adiante e nos acompañe no noso camiño.

DOMINGO DE RESURRECCIÓN

O Domingo de Pascua celebramos a Resurrección de Xesucristo de entre os mortos. O triunfo do Señor resucitado sobre o pecado e a morte é o acontecemento que fundamenta a nosa fe cristiá. Pascua é dicir si ao amor e á vida, é apostar pola fraternidade. Vivir a Pascua é lanzarse a algo novo, é lanzarse a ser testemuñas da Resurrección na casa, no traballo, cos amigos: Xesús,  o Deus do Amor, está vivo e presente. Cristo, Xesús, resucitou! ALELUIA!

VENRES SANTO

A Paixón de Xesús revela a radicalidade do seu amor incondicional que se entrega libre, consciente e gratuitamente pola salvación e a reconciliación do home. El foi capaz de soportar os nosos sufrimentos e aguantar as nosas dores, porque sentía compaixón das nosas debilidades. O Amor foi o que moveu ao Nazareno durante os anos da súa vida, que culminan no xesto máis potente e escandaloso, profético e provocador… o Amor que tivo para confiar sen límites, mirar máis aló desta vida e buscar a eternidade para regalar a outros.

XOVES SANTO

Coa celebración da Cea do Señor adentrámonos no Misterio do Triduo Pascual, fonte e culmen de todo o noso ano litúrxico. O Xoves Santo concentra de tal modo o Amor humano e divino de Xesús entregado en servizo ata o extremo, do cal foi testemuña a historia humana. Un amor que nutre e fortalece todas as nosas experiencias humanas de amor e é capaz de expandilas a modos “sobrehumáns”. Este Xoves Santo recibamos este amor “ata o extremo” e deixemos que el nos renove e transforme: lávanos, «Señor, non só os pés, senón tamén as mans e a cabeza».

DOMINGO DE RAMOS

Hoxe é Domingo de Ramos termínase a Coresma. Neste día comeza a Semana Santa na que lembramos os últimos momentos da vida de Xesús.  Coa  súa entrada  en Xerusalén damos comezo á Semana máis importante na vida de Xesús. Con ramos e palmas nas nosas mans evocaremos o momento no que entra sobre un borrico «na cidade da paz», dicindo: Bendito o que vén en nome do Señor!, e acollémolo coa intención de compartir con El toda a Semana Santa. Admiramos a maneira humilde e pacífica  de como Xesús exerce a súa realeza, entrando na cidade montado sobre un asno. O seu reino non é deste mundo. A súa grandeza non se manifesta no dominio e o poder, senón no servizo e a entrega da súa vida.

BOCADILLO SOLIDARIO

Dende toda a Comunidade Educativa só podemos darvos as grazas polas vosas achegas e a participación neste día tan solidario. Onde unha vez máis podemos sentirnos orgullosos de Ser Vicencianos e vivir este compromiso solidario.

ENCARNACIÓN

Hoxe celebramos o Día do Si das Irmás, un momento cheo de significado no que as Fillas da Caridade renovan os seus votos. Este acto anual fortalece o seu compromiso coa vocación e asegura a constancia do seu servizo a Cristo.

BOCADILLO SOLIDARIO

O día 13 de marzo celebramos o Bocadillo Solidario, un pequeno xesto cun gran significado: compartir a maior riqueza , a riqueza da solidariedade. Seguindo o lema de Mans Unidas, unímonos á campaña contra a fame, porque xuntos podemos facer a diferencia. Foi unha xornada de conviencia e colaboración onde, os alumnos xunto co profesorado, realizaron unha camiñata ata o Dolmen de Axeitos. 

Grazas a todos por participar e achegar o voso gran de area! 

INICIO DA CORESMA

 A imposición da Cinza é un momento sagrado que marca o inicio dun período de reflexión e preparación que é a Coresma. Non é só un ritual relixioso, senón un chamado á acción, un chamado a vivir as nosas vidas de acordo cos principios do Evanxeo. Ínstanos a mirar cara a dentro, a examinar as nosas accións e motivacións, e a buscar a reconciliación con Deus e cos nosos semellantes. Neste tempo de Coresma, renovamos o noso compromiso de vivir en harmonía e lembramos a importancia da humildade e a sinxeleza, valores que están no corazón  do Carisma vicenciano. Os primeiros cursos realizaron unha breve celeración falando do tempo de Coresma e os cursos superiores, asistiron á eucaristía do Mércores de Cinza.

DÍA DA NON VIOLENCIA E DA PAZ

A pasada semana, toda a Comunidade Educativa, celebramos a xornada da non Violencia e a Paz co lema: SOA, SOA, SOÑA A PAZ, onde coa axuda da música e os diferentes elementos muscais quixemos formar  harmonías de esperanza, solidariedade e amizade respectando os Dereitos da Infancia. Estes son pezas crave para que as nosas sociedades sigan tendo como obxectivo fundamental a tolerancia, o respecto e a convivencia.

PROXECTOS COVIDE-AMVE

Durante esta semana, os alumnos voluntarios da ESO presentaron unha serie de proxectos solidarios da ONG das Fillas da Caridade (COVIDE-AMVE) aos estudantes de primaria. O obxectivo destas iniciativas é fomentar a solidariedade e o compromiso social entre todos os alumnos, animándoos a achegar o seu gran de area para axudar a quen máis o necesitan. Durante a presentación, os maiores compartiron diferentes proxectos que buscan mellorar a vida de persoas en situacións vulnerables. Os alumnos de primaria mostraron moito interese e entusiasmo, estas propostas queren fomentar nos máis pequenos a semente da empatía e a acción solidaria.

XORNADA DA INFANCIA MISIONEIRA

"Comparto o que teño" é o lema da Xornada de Infancia Misioneira que celebramos o domingo 19 de xaneiro de 2025. Un día moi importante, no que os nenos (e non tan nenos) estamos convidados a axudar aos demais nenos, especialmente aos que non teñen o necesario para vivir ou non coñecen a Deus. Somos misioneiros, e nós imos axudarlles coa nosa oración e o noso diñeiro.

EPIFANÍA DO SEÑOR

Celebramos a festa da Epifanía do Señor, é dicir, da manifestación de Deus a todos, non só ao pobo de Israel. Os Reis Magos veñen de Oriente, dun pobo e dunha cultura moi distinta da do pobo de Deus; e descobren no pequeno de Belén ao Mesías, ao Salvador. Os Reis traen ao Neno uns agasallos (que simbolizan a realidade de Xesús: ouro coma rei, incenso coma Deus, mirra coma home que vai a morrer); pero son eles os beneficiados: atópanse co gran agasallo de Deus que lles ofrece tamén a eles e a todos os que o desexen a salvación que crían posuír só os xudeus. Que saibamos acoller o gran agasallo que Deus nos ofrece en Xesús, camiño de vida e de salvación. E comprometámonos a compartir este gran agasallo de Deus a toda a humanidade, comezando polos máis próximos ofrecéndolles na vida ordinaria xestos sinxelos que reactive neles a esperanza.