NACEU DEUS, QUE SE FIXO PEQUENO PARA SER A LUZ QUE GUÍA O MUNDO

Vivir o Nadal dende o pequeno, o sinxelo, o que pasa desapercibido pero deixa pegada. Esa aperta que non precisa palabras, o sorriso dos teus fillos cando cruzas a porta, o "chama cando chegues".  Unha cunca de café compartida cun amigo, a man que se tende sen esperar nada a cambio, camiñar polo campo. 

A calor dunha chamada para preguntar como estás, a risa espontánea ao redor dunha mesa, a caricia ao final do día que nos di que todo está ben. 

Que este Nadal che envolva o que non se ve pero sente, o que non brilla pero ilumina, o que non se di pero transforma... o milagre de vivir e apreciar cada instante compartido. 

Que atopes a grandeza no pequeno, como o neno que naceu nun humilde pesebre para ser a luz que guía ao mundo.

EUCARISTÍA DO NADAL

A Eucaristía de Nadal celebrada pola nosa Comunidade Educativa foi un fermoso momento para despedir o trimestre. Nun ambiente de acollida e sinxeleza, convidáronnos a vivir o Nadal dende o corazón, con esperanza e espírito de servizo. Durante a celebración lembráronnos a importancia de levar a mensaxe de amor e paz de Xesús ao noso día a día, especialmente nun mundo que tanto o necesita. Nestas datas tan especiais queremos dar as grazas a todos os alumnos e ás familias pola súa inestimable colaboración na Operación Quilo. O obxectivo desta iniciativa é transmitir aos nosos alumnos o valor da Solidariedade, axudando a familias que necesitan deste xesto. 

Que o espírito do Nadal siga acompañándonos neste tempo e no vindeiro novo ano, enchendo as nosas vidas de alegría, amor e solidariedade.

IV DOMINGO DE ADVENTO

Este último domingo de Advento enfócase na proximidade do nacemento de Xesús. Neste día, lémbrase o encontro entre María, a nai de Xesús, e Isabel, a súa prima. Este é o primeiro xesto de María despois de acoller con fe a misión de ser nai do Salvador. Poñerse en camiño e marchar apresa xunto a outra muller que necesita neses momentos a súa axuda. Este é un dos trazos máis característicos do amor cristián: acudir xunto a quen pode estar a necesitar a nosa presenza, porque María ensínanos neste domingo para acompañar a vivir con quen o necesite.

ORATORIO

Por segundo ano ao longo deste trimestre, os alumnos de 6º de infantil e primeiro ciclo de Ed. Primaria tiveron o seu encontro no Oratorio. É unha actividade que forma parte da educación integral dos nenos no noso centro. 

Nel os  alumnos achéganse a Palabra de Deus, fomentando unha maior capacidade de escoita e reflexión. Este espazo de oración bríndalles a oportunidade de comezar a desenvolver unha relación profunda coa súa fe nun ambiente de recollemento e serenidade. A experiencia do oratorio ofrece múltiples beneficios para os alumnos. Non só reforza a súa capacidade de escoita e atención, senón que tamén lles ensina a valorar o silencio e o recollemento. 

A través da escoita da Palabra, os nenos desenvolven un maior coñecemento da Biblia e comezan a cultivar actitudes de agradecemento e oración, esenciais para o seu crecemento persoal e espiritual. Ademais foméntase a aprendizaxe a través da interioridade. Cremos que estes momentos de encontro con Deus proporciónanlles aos nosos alumnos unha base sólida de interioridade e fe, que lles acompañarán ao longo da súa vida.

III DOMINGO DE ADVENTO

O Terceiro Domingo de Advento é o domingo da alegría (ou «Domingo Gaudete») porque está próximo o Señor. Diso fálanos Juan Bautista anunciando no deserto, ante a multitude, que está a piques de chegar o Señor, e convídanos a preparar o corazón para acoller a Deus, facendo obras que dean bo froito. Pídenos cambiar, renovarnos...por iso nos grita Convértete!!

II DOMINGO DE ADVENTO

Neste segundo domingo de Advento é María, que sobe ao noso autobús, que nos ensina a ter unha escoita atenta á proposta de Deus. Ela acolle as súas palabras, a súa disposición para ser a Nai de Deus é un exemplo de total confianza e entrega. María é símbolo da espera activa e confiada na vinda do Salvador, e a súa figura inspira aos fieis para vivir con maior intensidade este tempo.

I DOMINGO DE ADVENTO

Onte comezamos o tempo do Advento, tempo que dá inicio a un novo ano litúrxico. Neste advento, cada domingo chegará este autobús morado, que é a nosa igrexa que está a buscar con ESPERANZA a XESÚS. Somos como di o xubileo "Peregrinos da Esperanza" camiño de Belén. Cada domingo asomarase á xanela do noso autobús un personaxe do Evanxeo que nos dirá unha palabra chave para atopar a Xesús. Neste primeiro domingo sóbense ao autobús os profetas que nos piden espertar, estar atentos, denuncian a nosa preguiza e dinnos ESPABILA!

FESTAS DA FAMILIA VICENCIANA

Os días 27, 28 e 29 de novembro a nosa Comunidade Educativa celebrou as Festas da Familia Vicenciana. Todas elas teñen o seu fundamento nas aparicións da Virxe María a Santa Catalina Labouré en 1830, na Rue du Bac, París. Dende aquel momento a Medalla Milagrosa, coa  imaxe da Virxe rodeada da frase: "Oh María, sen pecado concibida, roga por nós que recorremos a ti", converteuse nun emblema de esperanza e fe. Para as Fillas da Caridade, esta devoción non só representa un acto de veneración, senón que tamén reflicte a súa misión de servizo e amor cara aos máis necesitados. A Virxe Milagrosa é  o modelo de humildade e entrega, cualidades que as Fillas da Caridade levan a cabo na súa vida diaria a través do seu traballo en hospitais, escolas e orfanatos. As Fillas da Caridade esfórzanse por ser un reflexo do amor maternal da Virxe, brindando apoio e consolo a quen máis o necesitan. 

Nas distintas celebración realizadas polos alumnos pedímoslle que o seu legado de fe e servizo continúe inspirando as novas xeracións a vivir con amor e dedicación, lembrando que, do mesmo xeito que a Virxe, todos estamos chamados a ser instrumentos de paz e esperanza no mundo.